Првата фаза од прекинот на огнот започна на 19 јануари, а треба да заврши утре, а условите за втората фаза, која предвидува дефинитивен крај на војната, се уште не се преговарани. По неколку недели ќор-сокак, Израел вчера ги испрати своите преговарачи во Каиро, каде, според египетската влада, „започнаа интензивни дискусии за следните чекори од договорот за прекин на огнот“.
Во преговорите се вклучени и делегации од Израел и Катар, со учество на претставници од САД, соопшти Каиро. Палестинска исламистичка група денеска ја повика меѓународната заедница „да изврши притисок“ врз Израел да ја започне втората фаза од договорот, „без одлагање и одолговлекување“.
Хамас му ги предаде телата на четворица заложници на Израел во замена за ослободување на 643 палестински затвореници во текот на ноќта од средата кон четвртокот, во последната размена планирана за време на првата фаза од прекинот на огнот.
Денеска десетици Израелци се собраа на стадионот Блумфилд во Тел Авив за да присуствуваат на комеморацијата за еден заложник, 49-годишниот Цачи Идан, навивач на фудбалскиот клуб Хапоел Тел Авив, пред неговиот погреб.
Хамас ги врати и телата на Охад Јахаломи, 49-годишен француски и израелски државјанин, Ицик Елгарат, 68-годишен дански и израелски државјанин и 85-годишниот Шлом Мансур.
Сите четворица беа киднапирани од кибуц во близина на Појасот Газа на денот на крвавиот напад на Хамас врз Израел на 7 октомври 2023 година.
Вкупно 33 заложници, вклучувајќи тела на осум, се вратени во Израел од 19-ти јануари. Околу 1.700 Палестинци се ослободени од израелските затвори од планираните 1.900.
Од киднапираните 251 лице на денот на нападот, 58 се уште се во притвор. Израелската војска тврди дека има 34 загинати. Се уште се живи 24 мажи, од кои повеќето помлади од 30 години.
Останатите заложници треба да бидат вратени во Израел во втората фаза од прекинот на огнот, при што и израелската армија треба целосно да се повлече од Газа. Третата фаза треба да биде посветена на обновата на опустошената територија, гигантски проект кој ОН го проценуваат на повеќе од 53 милијарди долари.
По размената на затвореници и заложници во четвртокот, Хамас рече дека Израел „нема друг избор“ освен да започне преговори за продолжување на примирјето. На 22 февруари, Израел го суспендираше ослободувањето на околу 600 затвореници во замена за шест заложници, барајќи од Хамас да престане да организира „понижувачки церемонии“ за ослободување на заложниците.
Хамас минатата недела соопшти дека е подготвен да ги предаде сите преостанати заложници во Газа на Израел „со еден удар“ во текот на втората фаза.
Но, оваа фаза може да биде особено деликатна. Израел бара целосна демилитаризација на Газа и елиминација на Хамас, додека палестинското движење, кое владее со територијата од 2007 година, инсистира да остане. Израелскиот премиер Бенјамин Нетанјаху е под притисок на неговите екстремно десничарски сојузници во владината коалиција, кои се против завршување на војната.
Втората фаза од прекинот на огнот се очекува да се совпадне со почетокот на Рамазан, муслиманскиот месец на постот за време на кој тензиите меѓу Палестинците и Израелците често ескалираат, особено во Ал Акса, третото најсвето место на исламот, лоцирано во источен Ерусалим, на територијата припоена од Израел.
Стотици илјади Палестинци доаѓаат да се молат за време на Рамазан на ова свето место, каде што и најмал инцидент може брзо да прерасне во судири. Пристапот до Ал Акса ќе биде под „вообичаени“ безбедносни ограничувања, објави во четвртокот израелската влада.
Нападот на Хамас резултираше со смрт на 1.218 луѓе на израелска страна, од кои повеќето цивили, според АФП врз основа на официјални израелски податоци, вклучително и заложници кои загинале или биле убиени во заробеништво.
Во израелската одмаздничка офанзива во Појасот Газа загинаа најмалку 48.319, главно цивили, според податоците на Министерството за здравство на Хамас кои ОН ги сметаат за сигурни.
© Vecer.mk, правата за текстот се на редакцијата
