Денешните избори во Израел беа обележани со рекордна излезност на гласачите, а Бенјамин Нетанјаху и Гади Ајзенкот се обвинија меѓусебно за валкани политички трикови.
Според Централната изборна комисија, 55,7 проценти од гласачите гласале до 16 часот по локално време (15 часот по македонско време), што е за осум процентни поени повеќе во споредба со истото време на изборите во 2022 година. Ова е највисоката излезност до тој час откако почна да се бележи излезност на час во 1973 година. Гласале повеќе од четири милиони луѓе.
„Ги срушивме сите рекорди што ги водела Централната изборна комисија. Ваква излезност на гласачите не е забележана на национално ниво од 1973 година“, потврди Дин Ливн, вршител на должноста генерален директор на комисијата.
Додека гласачите се упатуваа кон гласачките места, Нетанјаху ги обвини арапските партии дека се обидуваат да ги украдат изборите, по извештаите дека луѓе со пликови полни со пари наводно се обидуваат да ги поткупат гласачите. Израелскиот премиер рече дека тројца високи функционери на партијата Раам се уапсени на југот од земјата, а кај нив се пронајдени пликови полни со пари.
Полиција: Тие беа уапсени пред да пристигнат на гласачките места
Израелската полиција потврди дека тројца локални жители се приведени во Негев под сомнение дека делеле пари во пликови со логоа на партијата Раам, но нагласи дека тие не биле идентификувани како партиски функционери. Додадоа дека нема докази што го поврзуваат раководството на партијата со наводната измама.
Раам ги отфрли тврдењата за систематски нерегуларности, велејќи дека станува збор за локален случај кој не е поврзан со партијата. На прес-конференцијата, Ливне го нарече овој „необичен“ инцидент „локализиран случај“. „Полицијата фати луѓе кои сакаа да поткупат гласачи дури и пред луѓето да пристигнат на гласачките места“, забележа тој.
Изборната кампања на Нетанјаху и неговата партија Ликуд вклучуваше предупредување за опасноста што ја претставуваат, според него, арапско-израелските партии, како и поттикнување страв од воспоставување палестинска држава, со цел да ги мобилизира своите гласачи.
„Не можеме да ја оставиме оваа битка на левицата и арапските партии кои сакаат да го уништат постоењето на еврејската држава. Затоа нема скари, нема одење на плажа. Одете на гласачките места и гласајте за Ликуд“, нагласи тој.
© Vecer.mk, правата за текстот се на редакцијата
