Процесот за евакуација на македонските државјани од регионот на Заливот е официјално завршен, рече денеска министерот за надворешни работи и надворешна трговија, Тимчо Муцунски. Тој информираше дека државата успешно одговорила на сите барања за помош, додавајќи дека не се предвидени нови организирани летови за евакуација.
„Ги организиравме чартер-летовите и ги евакуиравме сите наши граѓани што до тој момент бараа евакуација. Последниот авион од Дубаи беше темпиран подоцна, но по овој процес, веќе немаме намера да организираме нови евакуации“, рече Муцунски.
Министерот нагласи дека оние кои решиле да останат во овој регион, со оглед на актуелните политички и безбедносни тензии, отсега го прават тоа на сопствена одговорност. Според него, државата ја исполнила својата примарна обврска, да обезбеди безбеден пат до дома за секој што изразил желба за враќање. Интересно е што во рамките на оваа мисија, покрај нашите сограѓани, биле превезени и државјани на соседните земји, како и на земји членки на ЕУ.
© Vecer.mk, правата за текстот се на редакцијата
