Над 400 монети се откриени во петгодишните археолошки истражувања на локалитетот Градиште кај Црнобуки, Битолско, меѓу кои има и монети ковани во времето на Филип Втори Македонски, како и од Октавијан Август и античките градови Тесалоника, Пела, Амфиполис и Дирахион. Археологот Енгин Насух вели дека монетите ја откриваат хронологијата на античкиот град, а годинашните наоди сè уште се чистат и анализираат.
Иако постојат теории дека станува збор за античките градови Персеида или Линк, научниците засега не сакаат да донесуваат конечни заклучоци. Досегашните истражувања потврдуваат дека локалитетот бил развиен град од македонско-хеленистичкиот период со работилници, продавници и богата материјална култура, кој опстојувал до крајот на старата ера, а истражувањата ги продолжува заеднички македонско-американски тим.
Извор: СДК
© Vecer.mk, правата за текстот се на редакцијата
