Евроамбасадорот Михалис Рокас изјави дека Изборниот законик во основа е добар закон, но посочи дека е неопходно политичките партии да постигнат консензус за преостанатите прашања околу неговото усогласување.
Тој нагласи дека во моментов се водат разговори меѓу политичките партии и изрази надеж дека ќе се најде заедничко решение за ова, како што рече, чувствително прашање.
– Законот сам по себе е добар закон. ОДИХР и Европската комисија дадоа позитивна проценка и оценка, но она што преостана во моментов се модалитетите. Јас разбирам дека има несогласувања кога станува збор за овие моделитети, но чувствувам дека има добра волја тоа да се надмине. И Комисијата во Парламентот за Изборниот законик веќе работи, и се надевам дека партиите на толку важна работа, ќе бидат во можност да седнат и да постигнат консензус кога станува збор за ова сензитивно прашање. Меѓутоа, основите на законот и законот сам по себе, се навистина добри – рече евроамбасадорот Рокас.
© Vecer.mk, правата за текстот се на редакцијата
