Судот во Струга го прогласи градоначалникот Рамиз Мерко за виновен за кривично дело „несовесно работење во службата“ во врска со нерегуларности при назначувањето вршители на должност директори во општинските основни училишта во Лабуништа, Радолишта и Подгорци.
Судијата Јордан Јованов му изрече парична казна од сто дневни глоби, што изнесува околу 10.000 евра во денарска противвредност. При одредувањето на казната, судијата ги земал предвид олеснителните околности, особено тоа што Мерко нема претходни осуди.
Образложувајќи ја пресудата, судијата нагласи дека, за разлика од претходната ослободителна пресуда поврзана со набавката на луксузното возило „Ауди А6“, во овој предмет Мерко постапил спротивно на Законот за основно образование.
Тој посочи дека Државниот просветен инспекторат утврдил неправилности при назначувањето директори, кои не биле избрани од редот на вработените, без објавен оглас и без потребното искуство од пет години.
Јованов нагласи дека иако назначените директори ги извршувале своите обврски, начинот на нивното именување бил спротивен на законските правила, кои мора да се почитуваат.
Во случајот станува збор за повеќекратни незаконски назначувања, а едно лице било поставувано дури шест пати едноподруго без посебно одобрение.
Како олеснителна околност, судот ги земал предвид недостигот на кадри и потребата да се обезбедат плати за вработените.
Овие фактори, заедно со фактот што обвинетиот не бил претходно осудуван, влијаеле на одлуката да се изрече парична казна.
Обвинителството најави жалба на пресудата.
Во меѓувреме, против Мерко се водат уште два предмети поврзани со назначување директори во други училишта, како и процес за незаконско поставување спомен-обележје пред општинската зграда.
Пред деветнаесет дена, Судот во Струга го ослободи Мерко од обвинение за набавка на луксузното возило „Ауди А6“ и други возила за потребите на Општината.
© Vecer.mk, правата за текстот се на редакцијата
