Една вдовица одлучи да направи потег што длабоко ја трогна целата локална заедница. Таа ѝ ја подари својата вила на езерото Комо – чија вредност надминува 1,6 милиони евра – на општината Варена, со цел да го зачува споменот на нејзиниот покоен сопруг, Џанмарко.
Како резултат на тоа, некогашниот семеен дом нема да премине во рацете на нов приватен сопственик, туку ќе стане простор наменет за јавна употреба.
Вилата се наоѓа во срцето на Варена, на источниот брег на езерото Комо – една од најпознатите туристички дестинации во Италија. Овој историски објект на два ката долги години им служел како дом на брачната двојка. Покрај самиот имот, вдовицата одлучи да го донира и целиот мебел, како и сите предмети што се наоѓаат во него, пренесува „Дневно“ (Dnevno).
Луксузен имот со поглед што го одзема здивот
Имотот се издвојува по својот простран ентериер и исклучително атрактивната локација. Во приземјето се наоѓаат кујна, трпезарија, голема дневна соба и веранда со поглед кон градината, додека на горниот кат се сместени три спални соби и две бањи.
Имотот вклучува и голема панорамска тераса и градина, од кои се пружа поглед кон езерото Комо и околните планини. Токму овие пејзажи биле составен дел од животот на брачната двојка, а низ годините вилата станала место за бројни семејни собири и дружења со пријателите.
Подарок со еден клучен услов
Во договорот за подарок е вклучена одредба според која имотот мора да се користи исклучиво за јавен интерес во текот на следните 90 години. Со ова, Лоредана Спига Венијер сакала да се осигура дека нејзиниот некогашен дом ќе продолжи да ѝ служи на заедницата, наместо да стане приватна сопственост.
Вилата е наменета за одржување културни и туристички настани, а просторот е замислен како главно место за собирање на локалните жители и посетителите. На тој начин, некогашната приватна резиденција ќе добие нова намена, додека нејзината историја и поврзаноста со семејството ќе останат траен дел од животот во Варена.
Оваа одлука наиде на огромно одобрување во општината. Градоначалникот Мауро Манкони истакна дека Варена никогаш претходно нема добиено приватна донација на недвижен имот со толкава вредност. Условот имотот да се користи за јавен интерес во текот на следните 90 години треба да обезбеди овој исклучителен подарок да биде зачуван и за идните генерации.
Лична приказна зад великодушниот гест
Зад оваа значајна одлука стои трогателна лична приказна. Покојниот Џанмарко бил длабоко поврзан со Варена и чувствувал посебна наклонетост кон гратчето. Бидејќи немале деца, Лоредана одлучила дека нивниот дом – по завршувањето на нивниот заеднички живот – треба да продолжи да „живее“ како дел од локалната заедница.
Спомените на луѓето кои низ годините престојувале во домот сведочат за тоа колку оваа куќа ѝ значела на неа.
„Сите – роднини, пријатели и познаници кои беа дел од нашите животи – поминуваа време во куќата на улицата 'Виа дел Прато'. Тоа беше навистина посебно место“, изјави Лоредана за „Кориере ди Леко“ (Corriere di Lecco). Посебно место во нејзините сеќавања зазема терасата, од која таа и нејзиниот сопруг гледале кон местото каде што ги поминале заедничките години. Погледот кон покривите, светлата и боите на населбата, езерото и планините остана еден од најубавите симболи на нивниот живот во Варена.
„Со години, од терасата, го набљудувавме целото место со неговите светла и бои, езерото и планините“, се присети Лоредана.
© Vecer.mk, правата за текстот се на редакцијата
