САД планира да обезбеди оружје за Украина, меѓу кое и напредни противвоздушни ракетни системи Патриот, преку натамошна координација со НАТО.
Во интервју за американска телевизија, Доналд Трамп најави дека ракетите „Патриот“ ќе бидат достапни за Украина преку НАТО, а Алијансата ќе ја преземе финансиската обврска. Според најавата, оружјето ќе биде испратено до НАТО, кој ќе го дистрибуира понатаму до Киев.
Украинскиот претседател Володимир Зеленски потврди дека побарал помош од 10 ракетни системи Патриот, поради зголемените ракетни и дрон напади врз украински градови изминатата недела.
Системите Патриот се препознаваат како едни од најмоќните противвоздушни ракетни одбранбени технологии, способни да ги детектираат и неутрализираат напредните проектили.
Според изјавите на Зеленски, одделни европски земји се подготвени да дадат поддршка – Германија се согласила да учествува финансиски за два Патриот системи, Норвешка за уште еден, а и други европски партнери изразија намера да помогнат.
Трамп, пак, по неодамнешниот разговор со Владимир Путин, изрази незадоволство што нема напредок во насока на мирно решавање на конфликтот, истакнувајќи дека добиените позитивни сигнали од руската страна не се претвориле во конкретни чекори.
Тој најави дека во наредниот понеделник ќе даде значајна изјава во врска со Русија, без да наведе додатни детали.
Според Трамп, трошоците за испорачаното оружје ќе ги покрие НАТО. Алијансата се финансира од придонесите на нејзините членки, меѓу кои и САД.
© Vecer.mk, правата за текстот се на редакцијата
