На парадата учествуваа околу 7.000 припадници на вооружените сили – и мажи и жени, како и 102 летала (авиони и хеликоптери), 200 коњи и бројна воена механизација, соопшти француското Министерство за вооружени сили.
Дел од војниците маршираа во борбена опрема, наместо во свечени униформи.
Парадата беше организирана околу три централни теми: 100 години од симболот Bleuet de France (Францускиот синец), национално единство и иновации во одбраната.
Програмата започна во 9:55 часот по локално време со пристигнувањето на претседателот Емануел Макрон, кој изврши преглед на трупите, по што следеа воздушна, пешадиска, моторизирана и коњичка парада. Настанот заврши околу пладне.
Меѓу највпечатливите моменти на парадата беше појавувањето на бел овен по име Месауд, талисман на Првиот полк стрелци. Според француската телевизија TF1, ова е првпат од 1964 година наваму овој полк да ја изведе својата маскота на Шанзелизе.
Припадник на полкот изјави дека Месауд, кого го опишува како симбол на сила, плодност и истрајност, е присутен во полкот уште од неговото формирање во 1841 година. Секој војник, пред да тргне во борба, го гали овенот за среќа, објасни тој.
Присуството на животното не е само фолклорен момент, туку и знак на припадност и почит кон историјата на француската војска.
Паралелно, во комплексот „Лес Инвалидес“ во Париз се одржува јавна иницијатива со изложби на копнени возила и средби со воен персонал, информираат француските власти.
Оваа година се одбележуваат и 230 години од прогласувањето на „Марсељезата“ за национална химна на Франција. Песната, чија музика и текст се дело на воениот инженер и композитор Клод-Жозеф Роже де Лил, првпат била испеана во Париз на 30 јули 1792 година од страна на револуционерниот баталјон од Марсеј, по кој го добила и името.
„Марсељезата“ официјално станала химна на 14 јули 1795 година, а како државен симбол е повторно утврдена со закон во 1879 година.
© Vecer.mk, правата за текстот се на редакцијата
