Израел формално го прифати предлогот на претседателот на САД, Доналд Трамп, за прекин на огнот со Иран, нагласувајќи дека ќе реагира цврсто во случај на прекршување на договорот за примирје. Според изјавата на владата, земјата ги реализирала сите цели на својата операција.
Од кабинетот на премиерот Бенјамин Нетанјаху соопштија дека се елиминирани двете главни опасности од Иран – нуклеарната и балистичката. Израел тврдеше дека воспоставил контрола над воздушниот простор на Техеран, ги уништил стратешките цели и предизвикал сериозни загуби кај иранското воено водство. Притоа беше изразена благодарност до американските партнери за нивната помош во справувањето со иранската закана.
Овој прекин на огнот следи по напад со иранска балистичка ракета, што погоди станбена зграда во градот Бершеба, при што животите ги загубија најмалку четири лица. Тоа беше и пресуден момент за интервенција на САД.
© Vecer.mk, правата за текстот се на редакцијата
