Руска државна фабрика за експлозиви која ја снабдува војската набавила германска индустриска технологија и покрај западните санкции, дознава Ројтерс.
Опремата на Сименс пристигнала во фабриката Бијски Олеум (BOZ) во јужен Сибир преку руски посредник кој увезува технологија од Кина.
Според царинските податоци и документите за државни набавки, во октомври 2022 година, BOZ потпишала договор со Tehpribor од Калининград за испорака на регулатори на моќност на Сименс потребни за автоматизација на производствените машини.
Кратко пред рокот за испорака, Tehpribor добил пратка опрема на Сименс од кинеската компанија Хуиџоу Фун Тек, вклучувајќи два регулатори идентични со моделите што ги нарачала BOZ.
Сименс вели дека се придржува до санкциите
Ројтерс не пронашол докази дека Сименс знаел дека опремата ќе заврши во руска фабрика за експлозиви. Портпаролот на германската компанија изјавил дека Сименс строго се придржува до меѓународните санкции и бара од своите клиенти да го сторат тоа, но дека дел од стоката може да пристигне во Русија без нивно знаење.
Ниту Tehpribor ниту BOZ, ниту нејзината матична компанија - државната фабрика Свердлов, која веќе е под санкции од САД и Европа - не одговориле на прашањата на Ројтерс.
Портпаролката на Хуиџоу Фун Тека изјави дека компанијата може да купува директно од Сименс и дека добавувачот не ги прашал кој е крајниот корисник.
Дупки во санкциите
ЕУ и САД ја забрануваат испораката на стока што би можела да ѝ помогне на руската воена индустрија, но воените производители ја набавуваат својата опрема преку кинески посредници. Брисел првпат воведе санкции врз кинеските компании во декември 2024 година за снабдување на руски одбранбени фирми, а во јули на листата беа додадени уште седум компании од Кина и Хонг Конг.
Каја Калас, шефицата за надворешна политика на ЕУ, во февруари изјави дека кинескиот извоз на стоки ѝ помага на Русија во нејзината војна во Украина и го повика Пекинг да го запре тоа.
Клучен дел од производството на руски бомби
BOZ произведува ТНТ и ХМХ, експлозиви кои имаат и цивилна и воена примена, но фабриката ги исполнува нарачките од руското Министерство за одбрана. Според извори на Ројтерс, таа ги проширува капацитетите за да произведува и RDX, друг вид високо експлозив.
Западните воени аналитичари и украинското разузнавање велат дека недостигот на експлозиви е еден од главните проблеми во производството на гранати, минофрлачки ракети и воздушни бомби во Русија. Затоа Москва добива дел од својата муниција од Северна Кореја и Иран.
Автоматизираната опрема како Сименс овозможува поголемо производство со помалку работници, што е клучно бидејќи руската воена индустрија има сериозен недостиг на работна сила.
Конрад Музика од полската воена консултантска куќа Рохан вели дека ваквите високопрецизни делови „ја продолжуваат војната бидејќи ја хранат руската програма за вооружување“.
© Vecer.mk, правата за текстот се на редакцијата
