При изрекувањето на пресудата, претседавачката судијка Џоана Корнер денеска изјави дека Али Мухамед Али Абд-ал-Рахман е одговорен за злосторства од „незамислива суровост“.
Судиите во октомври го прогласија за виновен за воени злосторства и злосторства против човештвото. Злосторствата вклучуваат убиства, силувања и мачења. Ова е прва пресуда на Меѓународниот кривичен суд за злосторствата во Дарфур.
Судот утврди дека обвинетиот, познат и како Али Кушејб, бил еден од најважните водачи на милиција Џанџавид, поддржана од Владата, која се смета за одговорна за убиства на околу 300.000 луѓе во регионот Дарфур меѓу 2003 и 2006 година.
Казната е пократка бидејќи Абд-ал-Рахман доброволно се предал во 2020 година и поради неговата возраст од 76 години, пренесува ДПА.
Времето поминато во притвор ќе му се одбие од казната. Сè уште не е познато во која земја ќе ја отслужува затворската казна.
Абд-ал-Рахман ги негираше сите обвинувања.
Бројни сведоци за време на судењето го идентификуваа и детално ги опишаа масовните убиства, мачењата, силувањата и грабежите.
Граѓанската војна во јужен Судан избувна пред околу 20 години. Советот за безбедност на ОН му го довери на Меѓународниот кривичен суд гонењето на масакрите во Дарфур. Досега, ова е единственото судење.
© Vecer.mk, правата за текстот се на редакцијата
