Претседателот на Соединетите Американски Држави, Доналд Трамп, потпиша Проглас за голема катастрофа за округот Кер, Тексас, со што се дозволува дополнителна федерална помош за спасувачките екипи и локалните власти кои се борат со последиците од катастрофалните поплави.
„Овие семејства минуваат низ незамислива трагедија, со многу изгубени животи, а многумина сè уште се водат како исчезнати“, рече Трамп на својата платформа Truth Social.
Илјадници евакуирани, стотици спасени
Трамп нагласи дека неговата администрација тесно соработува со државните и локалните власти, а министерката за внатрешна безбедност Кристи Ноем ги обиколи погодените области заедно со гувернерот на Тексас, Грег Абот.
„Нашата неверојатна крајбрежна стража, заедно со државните тимови за итни интервенции, спасија повеќе од 850 животи. Бог да ги благослови Тексас и сите семејства!“ рече претседателот.
Според најновите податоци, бројот на жртви од поплавите се искачи на 59, изјави заменик-гувернерот на Тексас, Ден Патрик, за „Фокс њуз“, истакнувајќи дека „за жал, се очекува бројот да продолжи да расте“.
Рекордните дождови предизвикаа ненадејни поплави
Поплавите беа предизвикани од рекордните врнежи од дожд што го погодија централниот дел на Тексас, особено областа на реката Гвадалупе. Во некои делови од регионот, дождот падна во количини мерени со децении, предизвикувајќи ненадејни поплави и хаос на теренот.
Гувернерот Грег Абот претходно прогласи вонредна состојба, а службите за пребарување и спасување работат по наредба сите исчезнати лица да се третираат како живи сè додека не се докаже спротивното.
Федерална помош, дополнителни спасувачки единици и логистичка поддршка сега се насочуваат кон најпогодените области, додека локалните власти предупредуваат дека бројни патишта и мостови се оштетени или непроодни.
Се очекува наредните денови да бидат клучни за спасување на преостанатите жртви и проценка на вкупната штета, која веќе се мери во милијарди долари.
© Vecer.mk, правата за текстот се на редакцијата
