Откриени се нови информации за хиперсоничното оружје „Темниот орел“ што го развиваат Соединетите Американски Држави, кое може да ја погоди Москва.
Станува збор за систем лансиран од приколка што може да патува на долги растојанија со хиперсонична брзина.
Тоа, пишува „Воена зона“, а објавува и „Вечерњи лист“, го прави идеално оружје за таргетирање цели со висок приоритет и временски чувствителни цели кои се исклучително добро бранети.
Тоа е исто така првото вистинско хиперсонично оружје наменето за оперативна употреба од страна на американските сили.
Генерал-потполковник Франциско Лозано го известил на американскиот секретар за одбрана Пит Хегсет дека „Темниот орел“ има дострел од 3.500 километри.
Како што беше претходно напишано, ова оружје имало дострел од најмалку 2.775 километри. Сепак, не е јасно дали бројката се променила поради еволуцијата на оружјето и тестирањето или дали претходната бројка е намерно „разводнета“, што не е невообичаено со официјалните податоци за ракетните системи, објаснува „Воена зона“.
Лозано, исто така, опиша дека континентална Кина може да биде погодена од Гуам, Москва од Лондон и Техеран од Катар со ова оружје.
Друг офицер на американската армија, чиј идентитет не е објавен, рече дека „Темниот орел“ има боева глава од околу 13,6 кг, што е релативно мало за оружје со долг дострел. Дополнително, тој изјави дека „Темниот орел“ може да го покрие својот дострел за помалку од 20 минути.
Инаку, развојот на „Темниот орел“ се соочи со низа одложувања, а системот беше планиран да стане оперативен до крајот на фискалната 2025 година.
Важноста на ставањето на „Темниот орел“ во оперативна употреба има посебно значење, имајќи предвид дека САД заостануваат зад своите конкуренти во областа на хиперсоничниот развој, особено Кина.
Неименуваниот извор истакна дека во моментов се произведува еден „Темен орел“ месечно, но дека целта е да се удвои тој број.
Од друга страна, постојат и мислења дека ова оружје ќе се произведува во премали количини и по превисока цена, што значи дека нема да има големо влијание во долгорочен конфликт.
© Vecer.mk, правата за текстот се на редакцијата
