ВМРО-ДПМНЕ обвини дека актуелната состојба со водата за пиење во Гостивар е последица на, како што велат, долгогодишна негрижа на локалната власт предводена од СДСМ, ДУИ и Арбен Таравари, тврдејќи дека со години постоеле официјални анализи кои укажувале на неисправност на водата.
На прес-конференција, портпаролот на партијата Валентин Манасиевски изјави дека претседателот на СДСМ, Венко Филипче, нема кредибилитет да ја критикува состојбата во здравството, бидејќи, според него, во периодот кога бил министер за здравство до институциите пристигнувале извештаи за загадена вода во Гостивар.
Од ВМРО-ДПМНЕ презентираа документи за кои тврдат дека се микробиолошки анализи од 2020, 2021, 2022 и 2023 година, во кои, според партијата, било наведено дека водата не ги исполнува условите за безбедност поради присуство на колиформни и аеробни мезофилни бактерии.
Манасиевски посочи дека извештаите биле доставувани до надлежните институции, но, како што рече, со години не било преземено соодветно постапување, поради што проблемот останал нерешен.
Од партијата оценуваат дека актуелната состојба е резултат на повеќегодишно игнорирање на предупредувањата и побараа одговорност за, како што наведуваат, занемарувањето на јавното здравје.
Обвинувањата се ставови на ВМРО-ДПМНЕ. Засега нема реакција од СДСМ, ниту од посочените институции во однос на изнесените тврдења.
© Vecer.mk, правата за текстот се на редакцијата
