Во неодамна објавена студија, истражувачите открија дека птиците се способни да го идентификуваат полот на луѓето и дека им дозволуваат на мажите да се приближат во просек за еден метар поблиску пред да одлетаат.
Наодите, кои биле доследни кај сите 37 проучувани видови птици, се објавени во списанието на Британското еколошко друштво. Научниците сега се надеваат дека ќе откријат што ги прави жените пострашни од мажите.
Коавторот на студијата, професор Даниел Блумстајн од Универзитетот во Калифорнија, изјави: „Целосно верувам во нашите резултати ‒ дека урбаните птици реагираат различно врз основа на полот на личноста која им се приближува, но во моментов не можам да ги објаснам“.
Студијата била спроведена низ Чешка, Франција, Германија, Полска и Шпанија и опфатила 2.701 набљудување. Во неа учествувале машки и женски испитаници, кои биле усогласени по висина и облека, додека оделе по права линија кон птиците во градските паркови и зелените површини. Меѓу проучуваните птици биле големата сипка, косот, чворот и детелите.
Вкупно, жените можеле да се приближат во просек на 8,5 метри од птицата пред таа да одлета, додека мажите можеле да пријдат на 7,5 метри.
„Ова е можеби најинтересниот дел од нашата студија. Идентификувавме феномен, но навистина не знаеме зошто се случува. Сепак, она што нашите резултати го истакнуваат е софистицираната способност на птиците да ја проценат својата околина“, изјави д-р Федерико Морели, уште еден коавтор од Универзитетот во Торино, пренесува The Independent.
Научниците откриле дека урбаните птици можат да го препознаат полот на луѓето што им се приближуваат, но не е јасно кои карактеристики ги идентификуваат птиците. Тие претпоставуваат дека можеби детектираат човечки феромони, облик на телото или начинот на одење, но велат дека се потребни повеќе истражувања.
Коавторката д-р Јанина Бенедети од Чешкиот универзитет за природни науки во Прага, изјави: „Како жена на терен, бев изненадена што птиците реагираа поинаку на нас. Оваа студија истакнува како животните во градовите ги ‘гледаат’ луѓето, што има импликации за урбаната екологија и еднаквоста во науката. Многу студии за однесувањето претпоставуваат дека човечкиот набљудувач е неутрален, но тоа не беше случај за урбаните птици во нашата студија. Птиците јасно реагираат на суптилни сигнали кои луѓето не ги забележуваат лесно. Следните студии би можеле да се фокусираат на поединечни фактори како што се обрасците на движење, мирисните сигнали или физичките особини, тестирајќи ги одделно наместо да ги групираат под полот на набљудувачот. Овој пристап би помогнал да се идентификуваат специфичните сигнали кои птиците ги детектираат“.
© Vecer.mk, правата за текстот се на редакцијата
