Татко и ќерка од Њу Џерси признаа вина за повеќегодишна шема за фалсификување уметнички дела, со која ги измамиле галериите и аукциските куќи. Тие продавале лажни слики од познати уметници, вклучувајќи ги Пабло Пикасо и Бенкси.
Ангажирале уметник во Полска
Според наводите на обвинителството, Ервин Банковски (50) и Каролина Банковска (26) ангажирале уметник во Полска да изработи најмалку 200 фалсификати, користејќи имиња на познати автори како Енди Ворхол и други, со што ги оштетиле купувачите за најмалку два милиони долари.
Обвинителите наведуваат дека делата често претставувале копии на помалку познати трудови на уметниците, а биле продавани преку аукциски куќи и галерии во САД, вклучувајќи повеќе аукциски институции кои подоцна соработувале со властите.
Еден од најскапите фалсификати бил продаден за околу 160.000 долари, додека други слики предизвикале сомнеж откако експертите забележале неправилности во материјалите и ознаките на задната страна на уметничките дела.
„Со години ги измамувале купувачите“
Двојката на суд ја призна вината и изрази каење. Тие сега се соочуваат со можни затворски казни, парични отштети и депортација.
Обвинителот Џозеф Нокела Јуниор изјави дека случајот покажува како обвинетите со години ги измамувале купувачите претставувајќи се како легитимни трговци со уметнички дела.
Експертката за криминал со уметнички дела, Ерин Томсон, оценува дека единствената невообичаена работа во овој случај е тоа што фалсификаторите се откриени, со напомена дека пазарот на уметнички дела е често подложен на измами.
© Vecer.mk, правата за текстот се на редакцијата
