Големината на стапалото не мора нужно да остане исто во текот на животот. Сепак, многу луѓе се обидуваат да ги втиснат стапалата во претесни чевли, што на крајот може да доведе до болка, деформитети и други проблеми со стапалата.
Можеби сте забележале дека чевлите што сте ги носеле без проблем во вашите дваесетти години, веќе не се толку удобни. Причината не мора нужно да лежи во самата обувка. Стапалата се менуваат во текот на животот и можно е нивната големина да се зголеми.
Истражувањата покажуваат дека голем број луѓе носат несоодветни чевли. Во една значајна студија, која опфатила 356 жени, мнозинството носеле претесни чевли, иако големината на нивните стапала се зголемила со текот на годините.
Постои дури и назив за обидот да се втисне стапало во премал чевел. Подијатарот Рок Позитано, директор на службата за нехируршки третман на стапала и глуждови при Болницата за специјална хирургија во Њујорк, го нарекува тоа „комплекс Пепелашка“. Како што објасни тој, ова се однесува на ситуација во која, на пример, се обидувате да втиснете стапало со големина 40 во чевел со големина 38.
Зошто стапалата се менуваат со возраста?
Неколку фактори можат да влијаат врз промените во големината и обликот на стапалото. Еден од нив е зголемувањето на телесната тежина. Зголеменото оптоварување може да го измени обликот на стапалото и да влијае врз меките ткива, мускулите, тетивите и лигаментите.
Кај жените, промени можат да настанат и за време на бременоста. Зголемувањето на тежината и изразеното отекување влијаат врз стапалата, но значајна улога игра и хормонот релаксин, кој влијае врз лигаментите за време на бременоста. Бидејќи стапалото содржи голем број лигаменти, нивното олабавување може да доведе до промени во обликот на стапалото; како резултат на тоа, некои жени забележуваат дека бројот на чевлите им се зголемува за еден, па дури и за два броја по бременоста.
Улога игра и стареењето. Ризикот од проблеми како што се болки во зглобовите, спуштени сводови, плантарен фасциитис, халукс валгус (чукли) и чекан-прсти се зголемува, особено по педесеттата година од животот. Сите овие фактори можат да го променат начинот на кој чевелот лежи на стапалото.
Претесните чевли можат дополнително да го влошат проблемот
Возраста и хормоналните промени не се единствените причини за проблеми со стапалата; значаен е и изборот на обувки.
Тесните чевли со шпицест врв, како и високите потпетици, ја префрлаат тежината на телото кон предниот дел на стапалото и ги притискаат прстите. Долготрајното носење на ваков вид обувки може да придонесе за структурни промени и деформитети.
Носењето погрешна големина може дополнително да ја влоши состојбата. Несоодветните обувки се поврзуваат со појава на тендинитис, плускавци и отекување на глуждовите, како и со болка што може да се шири кон колената, колковите и долниот дел на грбот.
Како да ги изберете вистинските обувки?
Постојат неколку едноставни правила што можат да ви помогнат при купувањето чевли:
- Најдобро е новите чевли да ги пробувате попладне, кога стапалата обично се малку поотечени по целодневна активност, односно одење и стоење.
- При мерењето, треба да стоите и целата тежина на телото да ја пренесете на стапалата.
- Важно е да ги измерите двете стапала бидејќи едното често е малку поголемо од другото; затоа, големината на чевлите треба да ја одредите според поголемото стапало.
- Помеѓу најдолгиот прст и предниот дел на чевелот треба да има простор колку ширината на палецот од раката. Прстите не смеат да бидат стегнати, а најширокиот дел од стапалото треба да одговара на најширокиот дел од ѓонот.
Постои уште едно правило што вреди да се запамети: не сметајте на тоа дека неудобните чевли со текот на времето ќе се „разгазат“ и ќе станат удобни.
Според Позитано, чевелот треба да биде удобен во делот на сводот, петата и предниот дел на стапалото уште во моментот кога ќе го обуете.
© Vecer.mk, правата за текстот се на редакцијата
