Високите бонуси за регрутирање што ги нуди Русија за да ги одржи воените напори во Украина вршат притисок врз националната економија, се наведува во неодамнешниот извештај на Институтот за проучување на војната.
Трошоците значително се зголемија поради бонусите и дополнителното вработување во одбранбената индустрија.
Во јули минатата година, рускиот претседател Владимир Путин потпиша декрет со кој стандардниот бонус за регрутирање е повеќе од двојно зголемен, од 195.000 рубли на 400.000 рубли (приближно 2.000 и 4.000 евра), што е речиси пет пати повеќе од просечната месечна плата во Русија, пишува „Бизнис инсајдер“.
Наскоро е неопходна присилна мобилизација
Кампањата за проширување ја стави војската во директна конкуренција со цивилните сектори за работна сила, предизвикувајќи зголемување на платите и цените, особено во услужните индустрии, бидејќи Русија продолжува да влева пари во својата воена машина.
„Русија не може бесконечно да ги надополнува своите сили со сегашното темпо на загуби без присилна мобилизација на резервите, што Путин досега не сакаше да го направи, ниту пак може да издржи постојано зголемување на готовинските плаќања што руската економија едноставно не може да ги поднесе“, напишаа аналитичарите на ISW, пренесува Индекс.
Според податоците на Центарот за стратешки и меѓународни студии од јуни, Русија имала повеќе од 950.000 ранети и мртви во војната. Аналитичарите на ISW предупредија дека Москва истовремено ја ублажува монетарната политика за да го поттикне растот и да ги зголеми воените трошоци. Таа комбинација се заканува дополнително да ја дестабилизира економијата.
Неодржливо високите исплати на војниците веројатно ќе ја еродираат куповната моќ на потрошувачите, на крајот ќе ја ослабнат рубљата и ќе ја продлабочат макроекономската нестабилност, пишуваат аналитичарите на ISW.
Администрацијата на Путин ги надмина своите цели за регрутирање минатата година, главно благодарение на дарежливите бонуси. Некои регионални влади дури нудеа бонуси споредливи со оние што ги нуди американската војска.
Воените трошоци се главен двигател на БДП
Таквиот пристап придонесе за краткорочен економски раст.
Економистите во „Бругел“, тинк-тенк со седиште во Брисел, пишуваат дека воените трошоци и трошоците поттикнати од бонуси биле клучните двигатели на рускиот БДП во 2023 и 2024 година. Бидејќи економијата била насочена кон воени цели, одбранбениот сектор и воените трошоци имале најголема корист.
Но, во средината на 2023 година, економијата почна да се прегрева, што ја натера централната банка неколку пати да ги зголеми каматните стапки.
„Сепак, бидејќи голем дел од кредитирањето се одвива со субвенционирани каматни стапки, а воено-индустрискиот комплекс е заштитен со јавни набавки, овие зголемувања на стапките првенствено ги погодија секторите што не се поврзани со војната“, додадоа економистите од Бројгел.
Дури и воено-индустрискиот сектор покажа знаци на стагнација на крајот од 2024 година.
„Економијата ги достигна своите граници на понудата“, пишува Бројгел.
Бидејќи централната банка на Русија го насочува кредитирањето кон сектори поврзани со војската, другите делови од економијата се сè повеќе потиснати.
Во меѓувреме, структурните слабости на руската воена економија продолжуваат, дури и ако досега изгледаше отпорна благодарение на приливот на средства поврзани со војната.
„Русија ги изгуби главните извозни пазари за своите одбранбени производи, се соочува со растечки трошоци поради избегнување на санкциите и страда од слаби политики за труд и миграција, што дополнително ги влошува нејзините структурни проблеми“, напишаа економистите од Бругел.
© Vecer.mk, правата за текстот се на редакцијата
