По месеци тишина, Северна Кореја конечно се огласи за разговорите со американскиот претседател Доналд Трамп, испраќајќи сигнал дека е можно обновување на дијалогот, но остро предупреди дека опцијата за денуклеаризација веќе не е тема за разгледување.
Една од најмаркантните надворешно-политички иницијативи на Трамп беше затоплувањето на односите со Северна Кореја, почетокот на директни разговори и историската средба со Ким Џонг Ун на 38-та паралела. По неговото враќање во Белата куќа, ниту Трамп ниту Ким не се фокусираа на обновување на односите, зафатени со глобалните случувања. Сепак, Пјонгјанг во вторникот преку влијателната сестра на лидерот, Ким Јо Џонг, првпат отвори можност за разговори, но надвор од темата за нуклеарно разоружување.
„Не сакам да негирам дека личните односи меѓу нашиот државен врв и сегашниот претседател на САД не се лоши,“ изјави Ким Јо Џонг за државните медиуми.
Таа сепак нагласи дека околностите се променети и дека секој нов обид за разговори за денуклеаризација би бил „исмевање“ на реалноста.
"Ако САД не ја прифатат новата реалност и продолжат по неуспешниот пат од минатото, тогаш состанок меѓу Северна Кореја и САД ќе остане само надеж – исклучиво од американската страна," рече таа, дополнувајќи дека „поволно би било да се бара друг вид контакт."
Ким Јо Џонг потсети и дека „2025 не е 2018 или 2019 година,” додавајќи дека капацитетите и геополитичкото опкружување на Северна Кореја доживеаја радикални промени.
Оваа оценка е точна – Пјонгјанг во последните шест години драстично го зголеми својот нуклеарен арсенал и го зајакна својот меѓународен статус.
Според достапните податоци, нуклеарниот арсенал на Северна Кореја се проценува дека се удвоил од 2019 година, а Стокхолмскиот меѓународен институт за истражување на мир (SIPRI) оценува дека земјата поседува околу 50 нуклеарни боеви глави и материјал за изработка на уште 90. Воедно, од 2022 година Северна Кореја тестираше над 100 балистички ракети, од кои 13 се интерконтинентални.
На 9 септември 2022 година, Ким Џонг Ун на седница пред Врховното народно собрание изјави дека Пјонгјанг никогаш повеќе нема да разговара за денуклеаризација и „никогаш“ нема да се откаже од нуклеарното оружје. Само еден ден претходно, тој потпиша закон со кој радикално се дефинира нова доктрина за користење на нуклеарното оружје доколку се загрози командниот или контролниот систем на земјата.
Покрај воените развојни програми, и геополитичката положба на Северна Кореја драстично се промени. Во 2019 година, државата немаше значајни сојузници, освен делумната поддршка од Кина. Но во 2025 година, војната во Украина ѝ овозможи да изгради тесен и продуктивен сојуз со Русија, која за возврат добива опиплива воена поддршка. Илјадници севернокорејски војници учествуваа во протерување на украинските сили од Курск во ноември 2024. Ова беше формално признаено од двете страни дури оваа година.
Сега Пјонгјанг ужива во стабилна дипломатска и економска поддршка од Русија, што сериозно ја зајакнува неговата позиција во однос на САД.
СЕВЕРНА КОРЕЈА ГИ ОДБИВА НАПОРИТЕ НА ЈУЖНА КОРЕЈА ЗА НАМАЛУВАЊЕ НА ГЕОПОЛИТИЧКИТЕ ТЕНЗИИ
Трамп сѐ уште кратко се осврна на Северна Кореја во својот втор мандат, одбележувајќи ја 72-годишнината од крајот на Корејската војна во изјава со зборовите дека е „горд што како актуелен претседател ја премина демилитаризираната зона во Северна Кореја.“
Северна Кореја продолжи со критиките кон САД, но се издвојува тоа што речиси и да нема лични напади кон Трамп.
© Vecer.mk, правата за текстот се на редакцијата
