Поранешниот руски министер за транспорт беше пронајден без знаци на живот денеска, откако претходно во денот беше разрешен од функцијата со указ од претседателот Владимир Путин. Властите првично ја разгледуваат верзијата за самоубиство.
53-годишниот Роман Старовојт ја извршуваше функцијата министер за транспорт од мај 2024 година, а причините за неговото отпуштање не беа наведени во официјалното соопштение.
Според информациите од истражниот комитет на Русија, телото на Старовојт било најдено во неговиот автомобил, со прострелна рана во главата. Истрагата за неговата смрт е во тек, а според портпаролката Светлана Петренко, наводната причина е самоубиство.
Руските медиуми посочуваат дека назначувањето и разрешувањето на Старовојт би можеле да се поврзат со истрага поврзана со проневера на средства за изградба на одбранбени утврдувања во регионот Курск, каде што тој претходно бил гувернер.
Токму оваа наводна злоупотреба на државни средства е потенцирана како една од причините за недостатоци во руските одбранбени линии, кои не успеаја да спречат украински сили да навлезат во регионот на Курск минатата година.
Разрешувањето на Старовојт се случи во период на сериозен сообраќаен хаос во Русија, предизвикан од масовни нарушувања и приземјување на летови поради украински дрон-напади врз руските аеродроми.
© Vecer.mk, правата за текстот се на редакцијата
