Министерствата за надворешни работи на двете земји објавија дека е постигнато „соодветно решение за последиците“, со што се стави крај на спорот што ги оптоваруваше односите меѓу Москва и Баку, пишува „Еуроњуз“.
Детали за договорот
Во заедничката изјава на министерствата се наведува дека договорот следел по состанокот на претседателите на Азербејџан и Русија во Таџикистан на 9 октомври 2025 година. Договорот вклучува исплата на руска отштета на жртвите во Азербејџан. Во изјавата, исто така, се нагласува дека билатералните односи „ќе продолжат да придонесуваат за зајакнување на добрососедските врски и проширување на соработката во интерес на народите на двете земји“.
Трагедија над Грозни
Несреќата се случи на 25 декември 2024 година, кога авионот на летот 8432 се урна во близина на Актау, Казахстан. 38 лица загинаа во падот, а 29 беа повредени. Трагедијата се случи откако руска ракета, испукана во близина на Грозни, го погоди авионот во лет и предизвика критична штета.
Извори од азербејџанската влада изјавија еден ден по несреќата дека на оштетениот авион, и покрај барањата на пилотот, не му било дозволено да слета на ниту еден руски аеродром, поради што бил принуден да лета над Каспиското Езеро кон Казахстан.
Од негирање до признание
Кремљ првично негираше каква било вмешаност и сугерираше дека удар од птица можеби ја предизвикал несреќата на патничкиот авион. Сепак, Баку и претседателот Илхам Алиев инсистираа на одговорноста на Москва, повикувајќи се на резултатите од првичната истрага и сведочењето.
Неколку дена по трагедијата, претседателот Алиев рече: „Јасно ги презентиравме нашите барања до руската страна. Прво, руската страна мора да му се извини на Азербејџан. Второ, мора да ја признае својата вина. Трето, одговорните мора да бидат казнети и да се плати отштета.“
Трагедијата стана голема пречка во односите меѓу двете земји. Рускиот претседател Владимир Путин подоцна се извини за несреќата, но се воздржа од прифаќање на одговорноста. Речиси една година подоцна, Путин призна дека руската воздушна одбрана, која беше во состојба на зголемена готовност за можни украински беспилотни летала над чеченската престолнина, е одговорна за соборувањето на авионот и понуди да плати отштета.
© Vecer.mk, правата за текстот се на редакцијата
