Министерството за државна безбедност соопшти дека „странските шпиони стануваат сè поактивни во инфилтрирањето и крадењето тајни од Кина“ и ги повика државните службеници да бидат повнимателни.
-Некои функционери предизвикаа сериозна штета со протекување тајни поради недостаток на доверба, ослабена дисциплина и непочитување на правилата, се вели во соопштението на Министерството.
Меѓу откриените случаи беше и оној на функционер од покраинската влада кој паднал во „внимателно подготвена стапица за протекување“ додека бил на службено патување во странство.
-Не можејќи да одолее на заводливиот изглед на странски разузнавачки агент, тој последователно бил уценуван со интимни фотографии и принуден да предаде официјални документи по враќањето во Кина, соопшти Министерството. Службеното лице е осудено на пет години затвор за шпионажа.
Во друг случај, вработен во општината тајно фотографирал доверливи документи и ги продал на странски шпионски агенции за да ги отплати долговите од коцкање.
Министерството, исто така, спомена млад државен службеник со ветувачка кариера кој ја изгубил работата откако споделил доверливи информации со роднина. Вториот ги снимил и ги испратил до разузнавачките служби.
-Без цврсти убедувања и самодисциплина, службениците ризикуваат да бидат вовлечени во криминалниот свет на странските разузнавачки служби, предупреди Министерството.
Кина и САД редовно се обвинуваат меѓусебно за шпионажа. Во март оваа година, поранешен инженер беше осуден на смрт во Кина за предавање државни тајни на странска земја.
© Vecer.mk, правата за текстот се на редакцијата
