Ел Салвадор започна еден од најголемите судски процеси во својата историја. Дури 486 осомничени, за кои локалното обвинителство тврди дека се високо рангирани членови на озлогласената банда МС-13, беа изведени пред судот.
Обемот на обвинението е зачудувачки: групата е обвинета за повеќе од 47.000 кривични дела извршени во период од десет години (2012-2022), вклучувајќи брутални убиства, изнуда и шверц со дрога и оружје.
Овој масовен процес е директна последица од безмилосната „војна против бандите“ што ја започна претседателот Наиб Букеле. Клучниот момент за ваков вид радикална правна офанзива беше крвавиот викенд во март 2022 година, кога 87 лица беа убиени во бран насилство, по што државата воведе вонредни мерки.
Додека државниот обвинител на Ел Салвадор ја уверува јавноста дека има неоспорни докази и најавува барања за максимални затворски казни, меѓународната заедница не ја крие својата загриженост. Експертите на Обединетите нации предупредуваат дека ваквите колективни судења сериозно го нарушуваат правото на фер одбрана, презумпцијата на невиност, како и основните процедурални стандарди.
Во моментов, 413 обвинети се во притвор, додека преостанатите 73 обвинети се судат во отсуство и за нив се издадени налози за апсење. Иако процесот е започнат, сè уште нема официјална проценка колку долго би можела да трае оваа постапка.
Букеле го обнови својот мандат во 2024 година, а неговата стратегија за масовно затворање, и покрај критиките за кршење на човековите права, продолжува да ужива силна поддршка во земјата поради драстичниот пад на стапката на криминал.
© Vecer.mk, правата за текстот се на редакцијата
