ПКК почна со разоружување
ИСТАНБУЛ (АП) — Турскиот претседател Реџеп Таип Ердоган во саботата го поздрави почетокот на разоружувањето на милитантните курдски сепаратисти како крај на „едно болно поглавје“ во сложената историја на Турција.
Обраќајќи се на состанок на неговата владејачка партија АКП во Анкара, Ердоган изјави дека повеќе од четири децениската „чумата од тероризмот“, за која одговорноста ја носи Работничката партија на Курдистан (ПКК), конечно е при крај.
Изјавата на Ердоган дојде само ден по тоа, кога мажи и жени членови на ПКК во северен Ирак ги фрлија своето оружје во голем казан, каде што беше запалено. Овој симболичен чин беше препознаен како прв чекор кон планираното разоружување, дел од мировниот процес кој треба да стави крај на четиридеценискиот конфликт.
Потегот следуваше по апелот на лидерот на ПКК, Абдула Оџалан, кој од 1999 година е затворен на остров близу Истанбул. Тој во февруари ги повика своите приврзаници да свикаат конгрес и формално да ја распуштат и разоружат организацијата. Во мај, ПКК официјално најави дека ќе го направи тоа.
ПКК започна вооружена борба против Турција во 1984 година, првично со цел формирање самостојна курдска држава во југоисточниот дел на земјата. Со текот на времето, нивната цел се преобрази во борба за автономија и права за Курдите во рамките на Турција.
Конфликтот, кој се прошири и во Ирак и Сирија, зема десетици илјади животи. ПКК е прогласена за терористичка организација од страна на Турција, САД и Европската унија.
Претходните обиди за мир меѓу Турција и ПКК завршија безуспешно, последен пат во 2015 година.
Денеска се отворија широко вратите на голема Турција, силна Турција, турскиот век.
Во својата петочна изјава, ПКК објави дека борците што го положиле оружјето го направиле тоа како „чекор на добра волја и израз на посветеност процесот за мир да успее.“
Од сега натаму, нашата борба за слобода, демократија и социјализам ќе ја продолжиме преку демократски политики и легални средства.
Ердоган, сепак, нагласи дека не се одвивале никакви преговори или договарања со ПКК. „Проектот за Турција без терор не е резултат на преговори, компромиси или зделки“, изјави тој. Турските власти не објавија дали има отстапки во замена за положеното оружје.
Турскиот претседател најави и формирање на парламентарна комисија која ќе го следи мировниот процес.
© Vecer.mk, правата за текстот се на редакцијата
