„Причината е непозната, но нема закана за безбедноста на Естонија“, додаде министерот Игор Таро, пренесува естонскиот јавен сервис ERR.
Се наведува и дека околу 10 часот во среда, на 17 декември, естонските граничари, користејќи опрема за надзор, откриле неколку руски граничари во амфибиски гумен чамец (ховеркрафт) на реката Нарва, во близина на камениот бранобран Васкнарва, во округот Ида-Виру.
Ховеркрафтот се запрел кај камениот бранобран, кој се наоѓа и на руска и на естонска територија, на влезот во Чудското Езеро. Потоа тројца граничари се искрцале од него и прошетале покрај објектот.
Со тоа, руските граничари ја преминале границата од Русија во Естонија, а потоа се вратиле на руската страна од бранобранот, покажува видеото што го објави естонската полиција и гранична служба (PPA), пренесува Курир.
Руските граничари потоа се вратиле во ховеркрафтот и заминале назад на руската страна на реката.
Ерик Пургел, шеф на Источната префектура на PPA, изјави дека реагирале неколку естонски гранични патроли.
„Инцидентот е регистриран со опрема за надзор, а беше спроведена и почетна проверка на бранобранот. Воспоставен е официјален контакт со претставник на граничната служба на Руската Федерација за да се добие објаснување“, изјави Пургел.
Естонската гранична служба исто така го зголемила бројот на патроли со цел да реагира на какви било дополнителни инциденти.
Веднаш бил закажан состанок меѓу претставници на граничните служби, а Естонија очекува објаснување од Руската Федерација, соопшти PPA.
ERR наведува дека Министерството за надворешни работи на Естонија ќе го повика вршителот на должноста во руската амбасада на разговор.
Таро објасни дека инцидентот се случил во подрачје каде што, за да стигнат до Чудското Езеро од реката Нарва, руските пловни објекти мора да побараат дозвола за поминување преку естонска територија.
„Постои долгогодишен договор што се однесува на тоа. Секогаш нè известуваа однапред… Овој пат не нè известија и инцидентот се случи“, рече тој.
© Vecer.mk, правата за текстот се на редакцијата
