Вчера, турското министерство објави дека за време на пребарувањето во пештера за останките на поручникот Нури Мелих Бозкурт, кој беше убиен од Курдистанската работничка партија (ПКК) во 2022 година за време на операција на турската војска во Северен Ирак, вкупно 19 лица биле отруени со метан, од кои петмина починале, а останатите биле однесени во болница.
Утрово, министерството објави дека уште седум турски војници загинале како резултат на нападот со гас, со што бројот на жртви се искачи на 12.
ПКК го објави своето распуштање на 12 мај, одговарајќи на повикот упатен кон крајот на февруари од нејзиниот долгогодишен лидер Абдула Оџалан, кој од 1999 година отслужува доживотна казна затвор на островот Имрали во близина на Истанбул.
Курдската сепаратистичка група, која со децении води вооружена борба против турската влада, е прогласена за терористичка организација од Турција, САД, Европската Унија и Обединетото Кралство. Групата води вооружена борба против турската држава од 1984 година, во која загинаа десетици илјади луѓе.
Во соопштението се вели дека инцидентот се случил вчера за време на мисија за пронаоѓање на останките на турски војник кој претходно беше убиен во воена операција против забранетата Курдистанска работничка партија (ПКК).
Министерството додаде дека единаесет други војници кои исто така биле изложени на гасот во пештерата биле однесени во болница на лекување.
© Vecer.mk, правата за текстот се на редакцијата
