Владата на Венецуела испрати 15.000 воени и полициски лица на границата со Колумбија, додека администрацијата на американскиот претседател Доналд Трамп испраќа воени бродови во јужниот дел на Карибите.
Министерот за внатрешни работи Диосдадо Кабело на прес-конференција изјави дека силите се распоредени во пограничните држави Зулија и Тачира и дека ќе им се придружат бродови, авиони и беспилотни летала.
„Претседателот нареди да се гарантира мирот. Ако сакаат да влезат преку границата, нема да можат“, рече Кабело.
Американски бродови на пат
Три американски воени бродови, со повеќе од 4.000 морнари и маринци, се приближуваат кон регионот со цел да ги потиснат нарко-картелите. Трамп претходно побара од Пентагон да подготви опции за можни воени операции, што вознемири многу латиноамерикански лидери, објави Блумберг.
Кабело, исто така, ја повика Колумбија да ја зголеми безбедноста на својата страна од границата, истакнувајќи дека Каракас и Богота имаат „одлични односи“.
Мадуро повикува на мобилизација
Минатата недела, претседателот Николас Мадуро се обиде да ја минимизира акцијата на САД, но сепак ги повика граѓаните да се обединат и да се приклучат на милициите. Државната телевизија почна да емитува промотивни спотови за регрутирање.
© Vecer.mk, правата за текстот се на редакцијата
