Администрацијата на американскиот претседател Доналд Трамп се подготвува да ги откаже деловните и туристичките визи за дури 200.000 странци кои поднеле барање за азил или моментално бараат азил во САД, според документите на Стејт департментот.
Се очекува Стејт департментот да започне со откажување на таканаречените визи Б1 и Б2 издадени помеѓу 2016 и 2026 година на нивните носители кои поднеле барање за азил или моментално бараат азил во САД во наредните недели, објави АП.
Мерката се спроведува во координација со Министерството за внатрешна безбедност на САД.
„Се координираме со Министерството за внатрешна безбедност за да ги идентификуваме и поништиме неимигрантските визи на странците кои дошле во Соединетите Држави тврдејќи дека се краткорочни посетители, но потоа поднеле барање за азил за да останат тука трајно“, изјави портпаролот на Стејт департментот, Томи Пигот.
Пигот не го потврди бројот на визи што би можеле да бидат поништени, велејќи дека процесот ќе биде постепен и бројот ќе биде променлив. Официјалните лица изјавија дека поништувањето на визите нема автоматски да значи итна депортација. Повеќето луѓе со барања за азил во исчекување би биле прекласифицирани, но би го изгубиле својот деловен или туристички статус.
Заменик-државниот секретар Кристофер Ландау ги критикуваше луѓето за кои рече дека користат деловни и туристички визи за да влезат во Соединетите Држави, а потоа аплицираат за азил.
„Азилот не треба да биде дупка во законот за заобиколување на законите за имиграција“, напиша Ландау на платформата за социјални медиуми X.
Визите Б1 генерално се издаваат за деловни патувања, додека визите Б2 се за туризам, посета на семејство и пријатели или медицински третман.
Кандидатите за овие визи мора да потврдат дека немаат намера да бараат азил во Соединетите Држави и мора да докажат дека планираат да се вратат во своите матични земји.
Во изминатите 18 месеци, Стејт департментот поништи околу 175.000 визи за лица осудени или обвинети за кривични дела, вклучувајќи возење под дејство на алкохол, силување и грабеж, како и за лица кои јавно ги критикуваа политиките на САД, особено на Блискиот Исток.
Документите на Стејт департментот добиени од АП покажуваат дека проверката на сегашните носители на визи Б1 и Б2 е започната откако Стејт департментот доби податоци за барањата за азил од Службата за државјанство и имиграција на САД.
© Vecer.mk, правата за текстот се на редакцијата
