Британците деновие почнаа да купуваат бензин во паника поради војната на Блискиот Исток, со долги редици на бензинските пумпи во Лондон и низ цела Велика Британија, бидејќи возачите брзаа да наполнат гориво пред очекуваниот скок на цените на горивата.
Бензинските пумпи како што се „Валеро“ во Бекенам, јужен Лондон, и „БП“ во Кројдон привремено останаа без гориво, а многу возачи пристигнуваа со канистри за да се снабдат за подолг временски период.
Стравот од недостиг на гориво е забележлив и во други градови во Велика Британија, објавува „Дејли меил“.
Во Ливерпул, редовите на пумпи како што се „Костко Воксхол“ и „Гоу 24 Хоур Експрес“ се протегаа до околните улици, додека во Манчестер десетици возила чекаа да се наполнат во трговскиот центар Трафорд.
Претставниците на британската автомобилска асоцијација АА ги повикаа возачите да не паничат и да не купуваат гориво во големи количини, но голем број граѓани го игнорираа овој апел. Вработените на бензинските пумпи во Велика Британија пријавуваат застој и хаотично снабдување.
Ситуацијата беше предизвикана од разгорувањето на конфликтите на Блискиот Исток, по што компаниите привремено го прекинаа транспортот на бродови низ Ормутскиот теснец, кој е клучен пат за глобалниот транспорт на нафта и течен природен гас (LNG). Околу 20 проценти од светската нафта и 25 проценти од течниот гас минуваат низ овој пат, а блокирањето или прекинот на транспортот веднаш влијае на цените на енергијата.
Аналитичарите предупредуваат дека долгорочната блокада на Ормутскиот теснец може да предизвика хаос на европскиот пазар на гас и да предизвика драстичен пораст на цените.
Претседателот на САД, Доналд Трамп, не ја исклучи можноста за испраќање американски трупи во Иран, алудирајќи дека „голема акција допрва доаѓа“. Неговите изјави и најави дополнително придонесуваат за глобалната неизвесност и потенцијалното зголемување на цените на енергијата.
Експертите заклучуваат дека продолжувањето на конфликтот може да предизвика инфлаторни шокови, не само преку енергијата, туку и преку дистрибуцијата на стоките и трошоците за транспорт. Европските економии, особено оние што зависат од увоз на енергија, се особено најпогодени, додека извозниците како Русија, Канада и Норвешка можат да профитираат од оваа ситуација.
© Vecer.mk, правата за текстот се на редакцијата
