Поранешниот врховен командант на украинската армија и сегашен амбасадор во Обединетото Кралство, Валериј Залужни, даде прогноза според која војната на Русија против Украина би можела да трае до 2034 година. Тој предупреди дека без темелна промена во одбранбената стратегија, конфликтот се заканува со долгорочно исцрпување.
„Ако се обидеме да воспоставиме примирје без да ја зајакнеме нашата идна одбрана, војната ќе се влече уште многу години. Започна во 2014 година, а ако даде Бог, ќе заврши во 2034 година“, рече Залужни во интервју за LB.ua, нагласувајќи дека Украина влезе во сосема нова фаза на конфликт во 2024 година.
Промена во руската тактика
Залужни опиша значајна промена во руската воена тактика. Според него, Кремљ го напуштил моделот на директни напади и се префрлил на војна на исцрпување, чија цел е и украинската армија и цивилите. Целта е да се искористат демографските и економските слабости на Украина.
„Во моментов, фронтовската линија постои главно за убивање“, остро рече Залужни.
„Во 2022 година, тенковите одеа напред, а пешадијата ги следеше. Сега тенковите и војниците ги сменија местата.“
Затоа, истакнува тој, Киев мора итно да ја прилагоди својата одбранбена стратегија и пристап кон мобилизацијата.
Неуспешни мировни преговори
Неговите коментари доаѓаат само еден ден откако третата рунда мировни преговори меѓу украинската и руската делегација во Турција заврши без никаков напредок.
Средбата траеше помалку од еден час, а Русија повторно го отфрли украинскиот предлог за целосно и безусловно прекин на огнот. Наместо тоа, Москва понуди само привремено примирје од 24 до 48 часа за евакуација на ранетите и мртвите.
Како што претходно објави Ројтерс, повикувајќи се на извори блиски до Кремљ, рускиот претседател Владимир Путин има намера да ја продолжи војната сè додека Западот не се согласи со услови што одговараат на Москва.
Залужни заклучи дека единствениот начин Украина да победи е „високотехнолошка војна за опстанок“ што ќе ја уништи воената и економската способност на Русија да ја продолжи војната.
© Vecer.mk, правата за текстот се на редакцијата
