По најавата на францускиот претседател Емануел Макрон дека во септември ќе ја признае Палестина, се огласи израелскиот министер за одбрана Израел Катц.
„Најавата на Макрон за неговата намера да признае палестинска држава е срам и предавање на тероризмот, доделувајќи награда и охрабрување на убијците и силувачите на Хамас, кои го извршија најстрашниот масакр врз еврејскиот народ од Холокаустот.
Наместо да застане покрај Израел во ова време на судење, францускиот претседател дејствува за да го ослаби.
Нема да дозволиме воспоставување палестински ентитет што би ја нарушил нашата безбедност, би го загрозил нашето постоење и би го поткопал нашето историско право на земјата Израел.
Сите сме обединети за да ја спречиме оваа сериозна опасност“, објави Катц на Х.
Францускиот претседател Емануел Макрон објави дека Париз официјално ќе ја признае Палестина на Генералното собрание на ОН во септември.
„Донесов одлука Франција да ја признае Палестина. Свечено ќе го објавам ова на седницата на Генералното собрание на ОН во септември“, напиша тој на социјалната мрежа „X“.
Тој на својот профил на X-net објави писмо што му го испратил на претседателот на Палестинската самоуправа Махмуд Абас, потврдувајќи ја намерата на Франција да стане првата западна сила што ќе ја признае државата Палестина.
„Францускиот народ сака мир на Блискиот Исток, од нас Французите зависи да покажеме заедно со Израелците, Палестинците и нашите европски и меѓународни партнери дека тоа е можно“, напиша Макрон во писмо до Абас.
Францускиот претседател, исто така, вели дека се потребни „демилитаризација на Хамас“ и „обезбедување на мирот и стабилноста на Газа“.
„Неопходно е да се изгради државата Палестина, да се обезбеди нејзината одржливост и да се овозможи, со прифаќање на демилитаризацијата и целосното признавање на Израел, да придонесе за безбедноста на сите на Блискиот Исток. Нема алтернатива. Францускиот народ сака мир на Блискиот Исток“, рече тој.
Тој исто така наведува дека „бремето е на Французите, заедно со Израелците, Палестинците и европските и меѓународните партнери, да покажат дека ова е можно“.
Според него, најважно сега е веднаш да се запре војната во Газа и да се обезбеди помош за цивилите.
© Vecer.mk, правата за текстот се на редакцијата
