Сергеј Караганов, долгогодишен советник на Кремљ и еден од највлијателните руски геополитички стратези, изјави на државната телевизија Русија 1 дека Русија не е во војна со Украина, туку со Европа.
Караганов е близок со Владимир Путин и Сергеј Лавров, тој го водеше Рускиот совет за надворешна и одбранбена политика и со години беше декан на Вишата економска школа во Москва.
Во интервјуто, тој даде низа изјави што ја покажуваат радикализацијата на реториката во рамките на рускиот режим.
„Војната нема да заврши додека не ја скршиме Европа“
Караганов во интервјуто изјави дека „тој не е претседател, па може отворено да зборува“.
„Војната нема да заврши додека не ја скршиме Европа. Морално и политички, додека пореметените европски елити не го запрат своето ново, лудо брзање кон светска војна“, рече тој.
Тој додаде дека Русија нема да може да постигне „конечен стабилен мир“, но ситуацијата би можела привремено да се смири. Според него, Европа - ќе се распадне.
„Европа повторно ќе се претвори во депонија на земји што се борат едни против други и проектираат војни, колонијализам, расизам. Тие порано можеа да го прават тоа, сега повеќе не можат да си дозволат колонијализам. Но, Европа повеќе не е мирното пристаниште за кое делумно погрешно мислевме дека е. Таа повторно е перверзно зло за целото човештво“, рече тој.
Според Караганов, руското раководство сега се соочува со „крајно неодговорна, дива и отупена европска елита“ и „масовно заблудено население“.
„Пропагандата во Европа е полоша од онаа во Германија пред Втората светска војна“
Караганов тврди дека европското општество е изложено на огромен медиумски притисок:
„Пропагандата што сега паѓа врз европскиот човек е полоша од она со што се соочуваше Европа, Германија, пред почетокот и на почетокот на Втората светска војна“.
Тој вели дека „не се сите Европејци луди“ и додава дека „се надева дека Европа ќе се освести пред да го преземе тешкиот грев на користење оружје за масовна одмазда“.
Ова е уште една во низата изјави на руски политички актери кои сè поотворено ја претставуваат војната во Украина како конфликт со Европа.
Изјавите на Караганов, една од клучните фигури во обликувањето на руската стратешка мисла, доаѓаат во време кога Русија ги интензивира нападите врз Украина и ја заострува реториката кон Европската Унија.
© Vecer.mk, правата за текстот се на редакцијата
