Американскиот претседател Доналд Трамп постигна трговски договор со Европската Унија во неделата на состанокот со претседателката на Европската комисија, Урсула фон дер Лајен, во Шкотска, објавија агенциите.
Договорот, кој вклучува царина од 15% за стоките од ЕУ што влегуваат во САД и значителни купувања на американска енергија и воена опрема од страна на ЕУ, ќе донесе добредојдена јасност за компаниите од ЕУ.
Сепак, основната царина од 15% многумина во Европа ќе ја сметаат за лош исход во споредба со почетната европска амбиција за договор за царина нула за нула, иако е подобра од закануваната стапка од 30%.
Американскиот претседател Доналд Трамп, по средбата со претседателката на Европската комисија, Урсула фон дер Лајен, изјави дека договорот со ЕУ е најголемиот договор постигнат досега.
„Постигнавме договор. Тоа е договор кој е добар за сите. Ќе нè зближи еден со друг. На некој начин, тоа е партнерство“, рече Трамп.
Како што изјави, ЕУ ќе инвестира 600 милијарди долари во САД, а ќе купи и енергетски производи во вредност од 750 милијарди долари.
Медиумите прво објавија дека вредноста на енергетските производи била 150 милијарди евра.
Тој исто така објави дека ЕУ ќе купи американска воена опрема.
Според фон дер Лајен, договорот ќе донесе стабилност.
„Ова е огромен договор. Дојде по тешки преговори“, рече претседателот на Европската комисија.
Фон дер Лајен додаде дека договорот ќе го врати балансот во трговијата меѓу двата главни трговски партнери.
Трамп: Блиску сме до договор со Кина
Американскиот претседател Доналд Трамп денес изјави дека неговата администрација е блиску до постигнување трговски договор со Кина, но не даде дополнителни детали.
„Многу сме блиску до договор со Кина. Всушност, веќе постигнавме некаков договор со Кина, но ќе видиме како ќе оди“, им рече Трамп на новинарите на почетокот од состанокот со претседателката на Европската комисија, Урсула фон дер Лајен, во Шкотска, објави Ројтерс.
Високи американски и кинески преговарачи ќе се сретнат утре во Стокхолм за да разговараат за долготрајните економски спорови што се во срцето на трговската војна меѓу двете земји, објави претходно Ројтерс, со проценка дека тие имаат за цел да продолжат еден вид примирје што ќе спречи воведување значително повисоки тарифи.
Порано денес, кинеските медиуми објавија дека се очекува Кина и САД да го продолжат прекинот на царинските давачки за уште три месеци на утрешните трговски разговори меѓу САД и Кина во Стокхолм.
Договорот со ЕУ - во последен момент
Средбата во неделата доаѓа неколку дена пред 1 август, кога Трамп рече дека ќе воведе 30 проценти царини за увоз од Европската Унија поради наводни трговски дисбаланси.
Сепак, американскиот претседател ја остави отворена можноста за откажување од повисоката царинска стапка доколку блокот отвори поголем дел од својот пазар за САД.
Германскиот канцелар Фридрих Мерц неодамна посочи дека наскоро би можел да се постигне договор во трговскиот спор. Американскиот претседател неодамна преговараше за договор за царинска стапка од 15 проценти со Јапонија - значително пониска од првично планираната.
Трамп, кој се стреми да го преуреди глобалниот економски систем и да ги намали децениските трговски дефицити на САД, досега постигна договори со Велика Британија, Јапонија, Индонезија и Виетнам, иако неговата администрација не успеа да го исполни ветувањето за „90 договори за 90 дена“.
Трамп периодично ја критикуваше Европската Унија, велејќи дека е „формирана за да ги измами САД“ во трговијата.
Негов главен проблем е трговскиот дефицит на САД со ЕУ, кој во 2024 година достигна 235 милијарди долари, според податоците на Бирото за попис на САД. ЕУ посочува на суфицитот на САД во услугите, за кој вели дека делумно го поправа балансот.
© Vecer.mk, правата за текстот се на редакцијата
