Во саботата, пишува „Волстрит џурнал“, европските претставници ги презентираа своите предлози за мир во Украина на Соединетите Американски Држави, додека американскиот претседател Доналд Трамп се подготвуваше за разговори со рускиот претседател Владимир Путин за завршување на војната, објавува „Ројтерс“.
Трамп објави дека ќе се сретне со Путин во Алјаска на 15 август, велејќи дека е блиску до договор за завршување на војната меѓу Русија и Украина.
Деталите за можниот договор сè уште не се објавени, но Трамп рече дека тој ќе вклучува „одредени размени на територии за взаемна корист“. Ова би можело да значи дека Украина се откажува од значајни делови од својата територија, исход што, според Киев и неговите европски сојузници, само ја поттикнува руската агресија.
Потпретседателот на САД, Џ.Д. Венс, се сретна во Велика Британија во саботата со украинските и европските сојузници за да разговараат за иницијативата на Трамп.
Според „Волстрит џурнал“, европските претставници изнесоа контрапредлог што вклучува барања да се договори прекин на огнот пред какви било други чекори и дека секоја размена на територија мора да биде реципрочна, со силни безбедносни гаранции.
„Не можете да го започнете процесот со предавање територија во средината на борбите“, цитираше весникот став на европски преговарач. Европските претставници со кои контактираше Ројтерс не можеа да ги потврдат овие наводи.
Зеленски го оцени состанокот како конструктивен
„Сите наши аргументи се слушнати“, рече тој во вечерното обраќање до Украинците.
„Патот кон мирот за Украина треба да се одреди заеднички, и само заедно со Украина. Тоа е клучен принцип“, додаде тој.
Тој претходно отфрли какви било територијални отстапки, велејќи дека „Украинците нема да ја дадат својата земја на окупатор“.
Францускиот претседател Емануел Макрон, исто така, нагласи дека Украина мора да има улога во сите преговори.
„Иднината на Украина не може да се одлучи без Украинците, кои се борат за својата слобода и безбедност повеќе од три години“, напиша тој на X по, како што рече, разговорите со Зеленски, германскиот канцелар Фридрих Мерц и британскиот премиер Кир Стармер.
„Европејците нужно ќе бидат дел од решението, бидејќи и нивната сопствена безбедност е во прашање. Потребни се јасни чекори“.
Зеленски интензивно разговараше со украинските сојузници во последните денови откако претставникот на Трамп, Стив Виткоф, ја посети Москва во среда, што Трамп го опиша како „голем напредок“.
„Потребни се јасни чекори, како и максимална координација меѓу нас и нашите партнери“, рече Зеленски претходно во саботата во X.
© Vecer.mk, правата за текстот се на редакцијата
