На брегот на Каспиското Езеро дојде до сериозно излевање на нафта откако беше оштетен еден од подводните нафтоводи на производното здружение „Азнефт“, кое работи во состав на Државната нафтена компанија на Азербејџан (SOCAR). Според официјалните информации, загадувањето со сирова нафта веќе е детектирано во приоблното подрачје на популарната плажа Дубенди, а дежурните служби реагирале веднаш по лоцирањето на инцидентот. За да се спречи понатамошно истекување на енергенси во водата, транспортот на нафта низ оштетениот крак на подводната инфраструктура е итно запрен, пренесува АПА.
Специјализираните нуркачки служби на „Азнефт“ веднаш беа упатени на терен за да извршат детална подводна дијагностика и да го утврдат точниот обем на штетата. Прелиминарните проценки на инженерите и нуркачите кои го прегледаа местото на пукањето покажуваат сериозни механички оштетувања, при што компанијата соопшти дека до пробојот на цевката најверојатно дошло услед надворешен механички удар, односно се претпоставува дека невнимателен брод го испуштил сидрото директно на трасата на нафтоводот.
Поради оваа хаварија веднаш е вклучен еколошки аларм, а локалните еколошки служби и тимови за вонредни ситуации започнаа со поставување на плутачки брани околу загрозеното подрачје на плажата Дубенди за да ја локализираат и соберат излеаната нафтена дамка пред ветерот и струите да ја прошират подлабоко во Каспиското Езеро. Истрагата за овој инцидент е во тек, а надлежните органи во моментов утврдуваат кој брод престојувал во спорниот реон и ја предизвикал хаваријата со непрописно закотвување. Овој сериозен инцидент повторно го отвори прашањето за безбедноста на подводната енергетска инфраструктура во регионот на Каспискиот Басен, кој е исклучително чувствителен на сите облици на индустриско загадување и бара итна меѓународна заштита.
© Vecer.mk, правата за текстот се на редакцијата
