Францускиот претседател Емануел Макрон и германскиот канцелар Фридрих Мерц жестоко ја критикуваа Европската Унија поради отворањето на тајни канали за комуникација со рускиот лидер Владимир Путин. На бурна, доцноноќна средба во Брисел, прва по подолго време без поранешниот унгарски премиер Виктор Орбан – Макрон и Мерц отворено ги препречија напорите на претседателот на Европскиот совет, Антонио Кошта, кој дејствува во име на сите 27 влади, да стапи во контакт со Кремљ. Овој судир извади на виделина огромни тензии во срцето на ЕУ за тоа каков пристап треба да има Европа кон Русија и кој всушност има легитимитет да зборува во име на целиот континент. Лидерите на некои од државите со најцврст став против Москва, како Данска и Холандија, застанаа зад Макрон и Мерц, покажувајќи невиден гнев кон Португалецот Кошта.
Тајни повици без мобилни телефони и „исфрлање“ на Италија и Полска
Итноста за решавање на ова прашање порасна откако американскиот претседател Доналд Трамп постигна привремен мировен договор со Иран, сигнализирајќи дека неговото внимание сега се враќа на Украина. Пет независни извори потврдија дека шефот на кабинет на Кошта, Педро Луртије, веќе двапати тајно контактирал со официјална Москва во последните неколку недели. Дискусијата во Брисел во четвртокот навечер, одржана во строга тајност, без помошници и без мобилни телефони поради чувствителноста на темата, траеше два часа подолго од планираното и ги разоткри двата главни табори во Унијата. Додека Макрон и Мерц сметаат дека не е време за разговор со Путин, и дека кога ќе дојде тој момент водството треба да го преземе „тројката“ (Франција, Германија и Велика Британија), огромно мнозинство други лидери застанаа зад Кошта, порачувајќи дека само претседателот на Европскиот совет може да ја претставува ЕУ.
Покрај расправијата меѓу Кошта и големите европски сили, на површина излезе и фрустрацијата на Италија и Полска, кои се чувствуваат исклучени од разговорите со Володимир Зеленски. Дополнителен гнев кај дел од дипломатите предизвика фактот што за тајните контакти со Кремљ дознале од медиумите. Кабинетот на Кошта се оправда дека кусите разговори биле воспоставени на директно барање на Зеленски за да се обезбеди дипломатски канал за одбрана на интересите на ЕУ кога ќе дојде моментот за мировни преговори. Новата рунда од оваа дипломатска војна се сели во Берлин, каде Мерц следната недела ќе ги пречека Макрон и премиерите на Велика Британија, Полска и Италија.
© Vecer.mk, правата за текстот се на редакцијата
