Францускиот лидер на крајната левица Жан-Лик Меланшон е оценет како најверојатен ривал на кандидатката на крајната десница Марин ле Пен во вториот круг од претседателските избори следната година, покажа анкетата објавена денеска, пренесува Ројтерс. Резултатите укажуваат на длабоко поларизирано гласачко тело во момент кога мандатот на Емануел Макрон се ближи кон крајот.
Меланшон, кандидат на крајно левата партија Непокорена Франција (LFI), според анкетата би можел да влезе во вториот круг во најмалку три од петте испитани сценарија, додека во четвртото сценарио е изедначен на второто место.
Се очекува, сепак, Ле Пен убедливо да го победи во вториот круг.
Резултатите од анкетата претставуваат лоши вести за француските центристички кандидати, кои тешко допираат до гласачите во земја чиешто гласачко тело е сè повеќе поларизирано.
Како што вториот и последен мандат на Макрон се ближи кон крајот, непопуларниот претседател зад себе остава ослабен политички центар и слаба економија, со што се отвора простор за партиите од тврдата линија, како LFI и Националното собрание на Марин ле Пен.
„Ризикот Ле Пен и Меланшон да се соочат во вториот круг е реален и сериозен“, изјави денеска центристичкиот кандидат Едуар Филип пред новинарите.
Според анкетата, Меланшон во првиот круг би освоил околу 16–17 отсто од гласовите, додека Ле Пен би добила 35–38 отсто. Во вториот круг Ле Пен би освоила 64 отсто од гласовите против Меланшон.
Меланшон веќе трипати се кандидираше за претседател – во 2012, 2017 и 2022 година – но никогаш не успеа да се пласира во вториот круг.
© Vecer.mk, правата за текстот се на редакцијата
