Машката контрацепција не е многу популарна. Во моментов, двете главни форми на контрацепција што ги користат мажите се употребата на кондоми и васектомијата. Иако кондомите не се 100% ефикасни, а голем број мажи сè уште „не ги сакаат“, васектомијата е сè уште табу тема во многу општества. Покрај тоа, тоа е практично неповратна процедура по која се губи плодноста, и која затоа не е прифатлива за мажите ако не се сигурни дека сакаат да се откажат од понатамошно потомство.
Меѓу ветувачките проекти се различни методи за намалување на бројот на сперматозоиди кај мажите, како и неколку варијанти на машки „анти-беби“ апчиња, кои би го спречиле созревањето на сперматозоидите за одреден период. Исто така, постојат идеи за гел што би се инјектирал во скротумот и би го спречил формирањето на здрави сперматозоиди, но и концептот за користење на ултразвук за загревање на тестисите, што би резултирало со прекин на производството на сперматозоиди за неколку месеци.
Можеби конечно доаѓа време мажите да преземат поактивна улога во спречувањето на непланирана бременост. Новата таблета за машка контрацепција, YCT-529, успешно го помина првиот тест за безбедност кај луѓе без да влијае на хормоните или тестостеронот. Се очекува оваа иновација да промени сè што досега знаевме за машката контрацепција.
YCT-529 делува без хормони и целосно го блокира производството на сперматозоиди
Традиционалните контрацептивни таблети кај жените носат хормонални промени и несакани ефекти. YCT-529 користи поинаков пристап: го блокира протеинот ретиноична киселина рецептор алфа, што е одговорен за производството на сперматозоиди. Тестирањата кај глувци и мајмуни покажаа дека таблетата брзо и целосно ја запира сперматогенезата. После прекинување на терапијата, животните целосно ја враќаат плодноста за 6 до 15 недели, без никакви пријавени несакани ефекти.
Првата фаза од тестирањето кај луѓе
Тестирањето на YCT-529 кај 16 здрави мажи што претходно направиле вазектомија покажа дека лекот е безбеден во различни дози. Кај ниту еден од испитаниците не се појавиле нарушувања во срцевиот ритам, хормоналниот баланс, воспаленија, сексуална функција или расположение. Лекот добро и брзо се апсорбирал и не предизвикал проблеми, за разлика од хормоналните таблети кои кај жените често предизвикуваат промени во расположението и либидото, зголемување на тежината и акни.
Машката контрацепција денес
Речиси половина од бременостите се ненамерни. Жените имаат избор меѓу таблети, импланти и спирали, а мажите засега можат да користат само кондоми или вазектомија. Сепак, вазектомијата е непредвидлива за повторно враќање на плодноста, додека кондомите се сè помалку користени. Повеќето идни таблети за мажи се базираат на хормонални промени, носејќи несакани ефекти. Иновативниот пристап на YCT-529 може да доведе до вистинска рамноправност во одговорноста за планирање на семејството.
Блиску до револуција
Новата, проширена клиничка студија веќе започна и опфаќа повеќе од 50 мажи, и оние со вазектомија и оние што донеле одлука да не станат родители. Тие ќе ја земаат таблетата секојдневно од 28 до 90 дена, додека истражувачите внимателно го следат безбедносниот профил и способноста на лекот да го спречи производството на сперматозоиди. Ако резултатите се позитивни, YCT-529 ќе биде првиот револуционерен, сигурен и реверзибилен начин за контрацепција за мажи пред крајот на оваа деценија.
© Vecer.mk, правата за текстот се на редакцијата
