Телеграм користи методи што можат да им овозможат на руските служби масовно да ги следат корисниците.
Деталната анализа од експерти за сајбер безбедност открива дека апликацијата Телеграм, иако позната по своите безбедносни тврдења, користи технички методи што можат да овозможат масовно надгледување на корисниците - особено од страна на руските безбедносни служби.
Според наодите од истрагата, повеќето комуникации на Телеграм не се заштитени со енкрипција од крај до крај, што значи дека до пораките на корисниците може да пристапат трети страни. Клучните идентификатори, како што е auth_key_id, се испраќаат неенкриптирани со секоја порака, што овозможува поврзување на одреден корисник со неговата активност, без оглед каде се наоѓа.
Експертите предупредуваат дека оваа практика го прави Телеграм ранлив на масовно надгледување. За разлика од апликации како Signal, кои користат докажани безбедни протоколи како TLS, Телеграм го користи својот протокол MTProto 2 со сериозни безбедносни недостатоци.
Исто така, алармантно е што целата комуникација преку Телеграм поминува низ инфраструктура која, според извештајот, има врски со руските безбедносни служби. Ова отвора можност за надгледување на милиони корисници, вклучувајќи политички активисти, новинари и обични граѓани.
Иако Телеграм нуди опција „Таен разговор“, која користи енкрипција од крај до крај, таа функција е непрактична и тешко достапна за повеќето корисници. Огромното мнозинство пораки, групи и канали остануваат незаштитени, што дополнително ги зголемува загриженостите на експертите.
Телеграм моментално има близу милијарда активни корисници ширум светот, а новите откритија покажуваат дека сите тие може да бидат предмет на надзор без нивно знаење и согласност.
© Vecer.mk, правата за текстот се на редакцијата
