Истражувањето е спроведено на примероци од безалкохолни пијалоци, пиво, лимонада, вино и вода што се продаваат во Франција
Околу 100 микрочестички пластика се пронајдени во литар пијалок од стаклено шише, што е од пет до 50 пати повеќе отколку во пластични шишиња или лименки.
Околу 100 микрочестички пластика се пронајдени во литар пијалок од стаклено шише, што е од пет до 50 пати повеќе отколку во пластични шишиња или лименки.
Француската национална агенција за безбедност на храната ANSES објави шокантни резултати од истражувањето што целосно ја менуваат сликата за безбедноста на пијалоците во стаклени шишиња. Долгогодишната претпоставка дека стаклото е поздрава и почиста опција од пластиката е побиена со откритието дека пијалоците во стаклени шишиња содржат многу повеќе микропластични честички од оние во пластични шишиња или лименки.
Истражувањето, презентирано во Journal of Food Composition and Analysis, е спроведено на примероци од безалкохолни пијалоци, пиво, лимонада, вино и вода што се продаваат во Франција.
Боја од капачињата
Резултатите ги изненадија дури и истражувачите: во просек, околу 100 микрочестички од пластика беа пронајдени во литар пијалок од стаклено шише, што е од пет до 50 пати повеќе отколку во пластични шишиња или лименки.
На пример, пивото имаше просек од 60 микрочестички на литар, а лимонадата околу 40. Безалкохолните пијалоци како што е колата имаа околу 30 микрочестички на литар, додека водата имаше најниски вредности - помеѓу 1,6 и 4,5 микрочестички на литар, во зависност од видот на пакувањето.
Овие микрочестички доаѓаат од бојата на капачињата на стаклените шишиња.
За време на складирањето и транспортот, капачињата се тријат едни од други, создавајќи ситни гребнатини на бојата, кои потоа се лупат и паѓаат во пијалокот. Микрочестичките имаат иста форма, боја и состав како бојата од капакот, што го потврди нивното потекло.
Виното како исклучок
Откритието предизвика големо изненадување, бидејќи се очекуваше токму спротивен резултат - дека пластичната амбалажа е главен извор на микрочестички. Виното покажа многу ниски вредности на микрочестички, дури и во стаклени шишиња со тапи, а причината сè уште не е позната.
ANSES истакнува дека во моментов нема јасни податоци за токсичноста на пластичните микрочестички во овие количини, но предупредува на потребата од понатамошно следење и истражување.
Во исто време, истражувачите предложија едноставен начин за намалување на контаминацијата: чистењето на капаците со воздух, вода и алкохол ја намалува содржината на микрочестички за дури 60%.
© Vecer.mk, правата за текстот се на редакцијата
