Биткоинот забележа еден од најсилните неделни растови во последните неколку години, искачувајќи се од околу 64.000 на 79.500 долари за само неколку дена. Растот започнал во средата, поттикнат од затворањето на кратки позиции, дополнителната ликвидност обезбедена од американското Министерство за финансии и новата поддршка за криптоиндустријата од Белата куќа, а по наглиот скок, биткоинот благо се повлекол и се тргувал околу 77.000 долари.
Ваквото движење доаѓа по повеќемесечен период на слабеење на најголемата криптовалута. Во претходните шест недели биткоинот главно се движел меѓу 62.000 и 66.000 долари, далеку под историскиот максимум од околу 126.000 долари, достигнат во октомври 2025 година.
Дополнителен позитивен сигнал за криптопазарот дојде од американската Комисија за хартии од вредност и берзи – SEC, која предложи нов регулаторен модел за криптоимот. Предлогот предвидува два начина преку кои компаниите би можеле да прибираат капитал без целосна регистрација на хартии од вредност и претставува прв формален предлог на SEC конкретно насочен кон понуди на криптоимот.
Претставниците на криптоиндустријата, според извештаите, главно позитивно го оценија предлогот, сметајќи дека условите се поповолни од очекуваното.
Растот на биткоинот се случува во период на силни турбуленции и на традиционалните финансиски пазари. Приносот на 30-годишните американски државни обврзници во текот на минатата недела достигна 5,29 отсто, највисоко ниво од 2007 година, додека вкупниот американски јавен долг првпат надмина 40 билиони долари.
Истовремено, американскиот долар падна на тримесечен минимум во однос на еврото, додека главните берзански индекси во Њујорк ја завршија неделата во минус.
Извор: Bankar.me, со податоци и информации преземени од Euronews, Bloomberg, Reuters, Axios, CNBC и други финансиски извори наведени во анализата.
© Vecer.mk, правата за текстот се на редакцијата
