Наместо политичка дебата, физичка пресметка во албанскиот парламент. Жестоки тензии и хаос ја одбележаа денешната седница, откако пратеници од власта и опозицијата влегоа во физички конфликт за време на гласањето по барањето за оставка на премиерот Еди Рама. Инцидентот следувал по расправија околу гласачко ливче, а тензиите започнале кога опозицискиот пратеник Белинд Кељичи побарал оставка од Рама, формирање преодна влада и распуштање на парламентот. Во меѓувреме, додека студентските протести траат веќе десет дена, опозицијата ја обвинува Владата за полициско насилство врз младите и притисоци врз нивните семејства.
– Не може да има нормално функционирање на парламентот во услови на длабока политичка и социјална криза – рече Кељичи, нагласувајќи дека опозицијата ги поддржува барањата за предвремени избори.
Конфликтот ескалираше кога шефот на парламентарната група на Социјалистичката партија, Таулант Бала, се јави за да ги брани постапките на државната полиција.
-Ниту една изјава не го оправдува насилството. Полицијата ги извршува своите должности во согласност со своите овластувања – рече Бала, пред пратеникот од Демократската партија, Фламур Нока, да го прекине неговиот говор со искинување на микрофонот.
По овој инцидент, владејачките социјалисти одлучија да ја прекинат дискусијата и директно да се премине на гласање за законските предлози што беа на дневен ред.
Amid violent protests in #Albania, opposition and ruling majority MPs physically clashed in Parliament this Thursday. #Protest https://t.co/uIHtHYi6K1
— Isa Myzyraj (@IsamyzyrajAlb) October 22, 2026
Пратениците на Демократската партија потоа ја блокираа говорницата, поставија столчиња на своите бироа и фрлаа гласачки ливчиња кон претседателот на парламентот, Ник Пелески.
Хаосот во салата беше проследен со физички конфликти, вклучувајќи инцидент меѓу пратеникот на Демократската партија, Фидел Креца, и пратеникот на социјалистите, Ервин Хоџа.
Пратеникот на Демократската партија (ДП), Фламур Нока, се упати кон делот од салата каде што седи мнозинството за да ги земе своите картички за гласање, а во таа акција му се придружиле и други пратеници.
Ситуацијата набрзо ескалираше кога пратеникот на Демократската партија, Фидел Крека, го фрли ливчето за гласање, а потоа го турна поранешниот министер за внатрешни работи Ервин Хоџа. Овој потег предизвика физичка пресметка меѓу двајцата.
Другите пратеници веднаш интервенираа во конфликтот, и од мнозинството и од опозицијата, што доведе до масовна тепачка во собраниската сала.
Тензиите за време на седницата се претворија во физичка пресметка меѓу пратениците, претворајќи ја парламентарната дискусија во сцени на хаос.
Во тој период, голем број демонстранти се собраа пред Парламентот, каде што се присутни и голем број полициски сили.
© Vecer.mk, правата за текстот се на редакцијата
