Албанскиот премиер Еди Рама, говорејќи во четвртокот во Брисел за студентските протести во Тирана, кои траат веќе 22 дена, изјави дека демонстрантите одбиваат дијалог и бараат негова оставка, но не изнесуваат јасно дефинирани барања.
„Протестирањето не е лесно. Зошто протестирате? ‘Не сакаме да разговараме со тебе; треба да си заминеш’. Извинете, но вие не ми ја дадовте оваа работа. Ајде да разговараме; подготвен сум да ве ислушам. Нема дијалог, нема разговор“, рече Рама во интервју за „Еуроњуз Албанија“.
Тој оцени дека проблемот е во тоа што сè поголем број луѓе излегуваат на улиците и бараат негово заминување, иако нагласи дека е важно да се слушнат демонстрантите и да се разбере што точно бараат.
„Тоа е демократија, тоа е слобода. Луѓето имаат право да го прават она што го сметаат за потребно“, рече Рама, додавајќи дека слободата на поединецот завршува таму каде што започнува слободата на другите.
На прашањето дали протестите влијаат врз него, албанскиот премиер одговори потврдно. Тој рече дека се обидува да ги искористи како можност да разбере како може да направи повеќе и да работи подобро.
Рама истакна дека Албанија бележи позитивни резултати во туризмот и економскиот раст, како и напредок на патот кон Европската Унија. Сепак, додаде дека граѓаните очекуваат повеќе отколку што економијата во моментов може да им понуди.
Студентските протести во Албанија започнаа на 13 октомври. Демонстрантите се собираат пред Министерството за образование и други државни институции во Тирана, барајќи оставки и подобри услови за работа. Поддршка добија и од универзитетските професори, кои ја прекинаа наставата на факултетите.
© Vecer.mk, правата за текстот се на редакцијата
